講。完。

(J按︰2006年暑假YCM第1場WARGAME，前SBSH時期，圖中各人各走各路)

由零柒年開始去到依家一轉眼就六年，當中唔少人因此加入成為我地一份子相對地亦有唔少人離開去行自己條路。

黎度依一刻如果要我去總結YCM-SBSH依六年係學校推廣Wargame活動既成敗，我覺得係成功。

但如果話要令大家真正明白點樣去享受Wargame過程的話，成績絕對麻麻。依個係一眾SBSHians既責任，需要反思。

既然係依度既最後一篇文，就打多最後一次「耶蘇文」希望大家睇完可以執到幾隻字有用，有一個快樂又長命既Wargame生涯。

每個人玩Wargame都有佢自己既理由，其中一個最多既原因不外於扮軍人／玩槍好有型（包括我自己）。

依個想法絕對唔係問題，只要你決心要係依個層面上做到盡（就如一位邱子文校友Ocen玩法軍做型玩到學埋法文黎打GAME）。又或者好似SBSHians一樣想得到型以外既野（明既就明，唔明又想明就自己扒下文）。

但最最最大獲就係兩頭唔到岸：想型但又型唔到，想打得又唔打得。最後結果就係為左得到一絲既成功感以不死黎欺騙自己，比自己一種強過其他人既感覺，最後打多兩三年解甲歸田退役放裝備。

咁點樣先可以持久力強呢？（男人最緊要係依樣野）

其中最最最最最最。。。（下刪一億個最）重要就係一個「死」字。

「死」／「Hit」（下稱死）依兩種講法由第一日玩Wargame就已經會有人教你：「比人射中你就要叫喇！唔係人地就係咁射你嫁喇！」

死由第一日打GAME所直接連接到既意思就係「痛」，因為「痛」所以你就驚，你就諗好多方法去等自己唔洗痛。

「係喎！比人射咁耐好痛嫁喎！不過唔怕，等我下次著多幾件衫再買一件重裝VEST。。。上埋頭盔TIM！咁咪唔怕囉！」

又或者「真係好痛喎！啊！唔怕！我整枝槍出黎射程可以由香港射到去中東既！咁咪唔怕入到人地射程囉！」

「掂晒喇今次！比坦克打中都無感覺喇！」／「掂晒喇今次！飛毛腿導彈都打唔到我喇！」

結果一個打下打下真係比人射中都無晒感覺，另一個就一路打一路退，後過死人區都唔知。咁既打法你絕對可以維持幾年時間但之後你就會慢慢開始覺得無意義。因為「無敵是最寂寞」，一黎你會慢慢麻木左「射靶」所比到你既一絲快感，二黎神憎鬼厭想搵人同你打都難。

講左咁耐，咁究竟我地打Wargame應該點去看待「死」呢？

就係接受佢，地上最強既子丹哥都唔係出世之後就突然之間做左地上最強喇！每一個成功既人背後都係經歷過無數次既失敗。你如果願意去接受自己「死」依件事，就代表住你明白到自己係有所不足，既然係有所不足亦等於你係擁有進步空間，有空間自然就有動力去繼續改善自己既作戰技巧。。。打得越成熟你就會越懂得點去享受一場Wargame。

而且每一次Wargame所面對既都係唔同人物配唔同場地，仲要配合埋當時你同你拍擋之間既合作反應。咁多變化，你慌你仲會寂寞？

雖然話Wargame並不是一個人的Wargame，但打Wargame絕對就係為左自己。

當然！每一個人都會有自己諗法，我以上所分享既你可能未必會認同。不過唔重要，最重要係認清自己打Wargame為咩。

唔好欺騙自己，Be truth to yourself。

最後送上一首歌，「死不可怕」，人生在世可以「死」得過一次正正就係Wargame所比到你最珍貴既野。後會有期。