0705睇後感(更新於0709)

第一次跟唔到SBSH出征，感覺非常難受。每次本人都會打返少少戰後感。雖然今次0705無去參戰但係都唔想有例外，只好又係度睇完大家o既戰後感再廢講幾句作少少回應。

To MG:

可以改善地方:
1)有埋圖片非常有心思，不過如果可以將己隊同敵隊有更清楚指示會比較好d。
2)打中文文章最好就有返d標點符號。(，=z月2)
3)檢討自己錯誤先係大家最想睇到o既主體，或者可以試下著墨多少少係每一場自己o既表現，好與唔好之處都可以寫低。一黎比自己有一次清晰自省，二黎大家可以從你o既經驗中學習。
4)對住女仔輕手d係無錯o既，依d先係君子嘛(haha)

可取之處:
1)有圖有字，睇落去會比較舒服
2)整理得幾清楚
3)懂得捉摸對手心理

睇完你篇野之後感覺上覺得你可以打返多少少前線先，因為前線作戰先係吸收經驗最快o既渠道。人少o既時候更加考驗你地隊友之間o既默契同戰略。好似你地咁樣分散打橫防守，除非擁有非常好o既地理優勢，否則只會比人逐一擊破。在本人自己黎講，集中火力方為上策(集中火力唔表示一定係攻)。另外早唔早死係睇好多方面，有時又唔一定係自己問題，隊友支援充唔充足都係一個關鍵。

To KO:

可以改善地方:
1)係打文之前可以先諗下點樣打先再落筆，依家睇落去唔係太順
2)臭脾氣，講過好多次，控制唔好情緒好難可以再冷靜思考。暫時係觀察上都仲未見到有改善，要加把勁喇!依樣野好影響你，包括你出黎搵工。
3)戰術唔係學識一種就只係得一種玩法，一種戰術都可以有好多變化。例如唔同o既時間用(一開頭就一口氣攻或者保留實力到中段全部一齊進攻)咁樣經已係兩種唔同效果。開game前冷靜諗清楚先。

可取之處:
1)從文章可以睇得出你係一個口直心快o既人
2)開始摸到點樣打c位
3)keep得到勇悍打法

近戰技術應該開始有進步，主動打C o既意識高左。記得學完野要融匯貫通，唔係學完就一定要照樣做先用到出黎，0724本人唔希望再見到一個發脾氣o既KO，ok?

To Star:

可以改善地方:
1)對講機係cqb上用途會無咁大，因為人與人之間距離唔會遠得去邊，無對講機的話大叫隊友隊友都會聽到。
2)你自己都講左，敵人唔死唔一定係因為佢不死，有可能係你射唔中嫁，知無?
3)唔走動其實係打wargame大忌，咁會令你更容易死。驚係源於你怕中槍，但係你唔走動你就會中槍，咁樣唔係好唔合邏輯咩?你可以諗下。
4)留意打返多少少標點符號，盡量唔好用(...)。

可取之處:
1)文章雖然係3人之中最短，但係文筆黎講算係最通順，下次打返多少少唔該。
2)大概都知道自己有咩野需要改善。

溝通能力比MG同KO好，不過團隊意識同戰鬥能力就比較需要改善。多返d走動會有好大幫助，同埋練返多少少個姿勢，因為以本人睇依家你個瞄準姿勢都幾辛苦同埋幾硬直(唔靈活)。同埋0724我地會一Team人行，你唔需要擔心唔走動。既然知道自己問題，就快d解決喇!